25.5.12
La Fiesta La Bretaña en Ciañu

El llugar llangreanu de Ciañu va acoyer la edición de la Fiesta La Bretaña, primer ocasión na qu’esti eventu lúdico-cultural va celebrase nel Estáu.

Esti próximu sábadu 26 de mayu, Ciañu va acoyer la celebración de la Fiesta la Bretaña, una ocasión única de conocer de primer mano una cultura de gran valir y mui venceyada a l’asturiana.

El Festival de La Bretaña va desenvolvese alrededor de la música y baille bretón con clases práctiques y una gran espicha-conciertu como remate final a la fiesta. Toles actividades son de baldre y p’asistir a les clases nun fai falta más qu’apuntase llamando al teléfonu 984282925 o al traviés del corréu electrónicu casadelosalberti@ayto-langreo.es. Les clases maxistrales d’acurdión y de baille tradicional bretón van ponese na Casa de los Alberti a les 16:30 y 18:30 hores y la espicha-conciertu va facese na cancha cubierta del IES La Quintana de Ciañu dende les 21:00 hores y va contar cola participación de los grupos Wipidoup, Kermabon-Kermabon, Fañch Loric y La Banda… LATIRA!

 
Díxolo Tin a les 7:27 PM | Dir a la páxina d'esta entrada | 1 Bilordios
7.5.12
Video Manifestación Pola Oficialidá 2012

El añu 2012 nun foi diferente que los anteriores, a la hora de salir a la cai pa protestar polos nuesos derechos como asturfalantes. Cada añu la situación ta más al llímite y la xente ta más cansao, pero siguimos caleyando pola cai Uría con determinación de fierro y les mires puestes en cambios que faigan medrar la movilización ciudadana. 

El nuberu nun faltó esta vegada, mandando al orbayu pa que nos acompañara a lo llargo de casi tol recorríu. Lo que nun fizo que menguare'l númberu de xente, comparándolu col de otros años. Pa que vos faigais una idea, nesti videu pue vese lo que se sintió dende dientro de la mani y nel posterior actu de l'Academia de la Llingua Asturiana, que se fizo nel teatru Filarmónica.
 
Díxolo Tin a les 8:08 AM | Dir a la páxina d'esta entrada | 2 Bilordios
2.5.12
Tolo d'Asturies 2012

PROGRAMA VI MUESTRA CULTURAL TOLO D’ASTURIES

Recintu ferial Estación d’autobuses de Llangréu

Sábadu 5 mayu

12:00 hores APERTURA MUESTRA CULTURAL TOLO D’ASTURIES
12:00 hores BANDA GAITES CONCEYU LLANGRÉU
13:00 hores GRAN SESIÓN VERMÚ D’ASTURIANADA
(Emisión pela TPA nel programa Sones)
18:00 hores MUESTRA DEPORTE TRADICIONAL
22:00 hores Conciertu

LLARIEGU 100% DIRECTO
ASINA SUENA LLANGRÉU (DUERNA + MARISA VALLE ROSO + BANDA GAITES CONCEYU LLANGRÉU + ARTISTES CONVIDAOS)
SPANTA LA XENTE

Tol día: Esposición Vistimienta Tradicional Asociación d’Etnografía y Folclor Reija de Llangréu Alcordanza: el traxe tradicional n’Asturies
Folixa y animación pa toos y toes con grupos de baille y música tradicional
Talleres pa neñes y neños (animación, xuegos y deportes tradicionales, artesanía…).

Domingu 6 mayu

12:30 hores MUESTRA DEPORTE TRADICIONAL
13:15 hores BANDA MÚSICA CONCEYU LLANGRÉU
17:00 hores MUESTRA CORAL DE LLANGRÉU (PADRE COLL + ESCOLINOS PADRE COLL + OCHOTE LANGREANO)
18:30 hores ESPECTÁCULU (HERBAMORA + ESCUELA MÚSICA TRADICIONAL REIJA DE LLANGRÉU)
20:30 hores CLAUSURA

Tol día: Esposición Vistimienta Tradicional Asociación d’Etnografía y Folclor Reija de Llangréu Alcordanza: el traxe tradicional n’Asturies
Folixa y animación pa toos y toes con grupos de baille y música tradicional
Talleres pa neñes y neños (animación, xuegos y deportes tradicionales, artesanía…).
 
Díxolo Tin a les 8:30 AM | Dir a la páxina d'esta entrada | 0 Bilordios
1.5.12
Manifestación pola Oficialidá 2012

El vienres 4 de Mayu, a les 19:30 na estación de la Renfe d'Uviéu... 

Podríemos dicir munches coses sobre la necesidá de dir, pero ya lo ficimos l'añu pasáu, podríemos denunciar los ataques a la nuesa cultura, pero ya lo ficimos l'anterior, podríemos falar de lo que-yos presta que quedes en casa y ganen la partía, pero ya lo ficimos fai dos años, podríemos escribir sobre'l poder que sólo tú tienes pa organizate y defender lo tuyo, pero dempués de tantu tiempu, ya ta to falao...

 El vienres 4 de Mayu, a les 19:30 na estación de la Renfe d'Uviéu.
 
Díxolo Tin a les 12:58 PM | Dir a la páxina d'esta entrada | 0 Bilordios
17.4.12
XXIV Conciertu pola Oficialidá

 La XDLA entama otru añu más el XXIV Conciertu pola Oficialidá. Esta vegada, va ser en Xixón, nel Parque Inglés (Parque de los Hermanos Castro), el 28 d’abril de magar les 19:30h..

Como ye vezu, el cartelu ta compuestu por músicos d'estremaos estilos y na carpa instalada nel Parque Ingés va poder sentise la música de Tuenda, Alfredo González, La Bandina, De Miguel, Wolfe y Quintana, Macadamia, Fala non Caduca y los míticos Dixebra.

El preciu de les entraes ye de 8 euros, anticipada, y de 10, na puerta. Los puntos de venta son: Café Trisquel y Barucu (Xixón); Malayerba y L’Esperteyu (Uviéu); El Cafetón (Avilés); La Gueta (Candás); Mesón Cervantes (Tinéu); El Azul (Cangas); L’Abellugu (Mieres); La Palmera (La Pola Ḷḷena); Abre César (La Pola Siero); Pub Piero’s (Grau); La Naveta (Nava); y el CSOA La Semiente (L’Entregu).
 
Díxolo Tin a les 10:57 AM | Dir a la páxina d'esta entrada | 0 Bilordios
15.2.12
Hamlet'34
El Nuevu Teatru La Felguera va acoyer esti miércoles 15 de febreru, a les 20:15 hores, la representación de la obra Hamlet’34, de la compañía Tabasko Teatro.

L’acción de Hamlet, de William Shakespeare, treslládase nesta adaptación a l’Asturies revolucionaria d’ochobre del 34 pa contanos la historia d’un llabrador traicionáu y asesináu pol hermanu, y la posterior venganza del so fíu. Una nueche, Hamlet recibe la visita del espectru de so pá afalándolu a vengar la so muerte. D’esta forma se-y da empiezu a un enfrentamientu enllenu engaños y trucos que va rematar na tráxica muerte de familiares y amigos de Hamlet. La entrada n’Asturies del exércitu republicanu, qu’acude a sofocar la revolución, pondrá fin a la traxedia ya impondrá la cordura nuna rexón onde dalgo güel podre...

Tabasko Teatro naz en 2011 como proyectu de la clase de segundu de Producción d’Audiovisuales, Radio y Espectáculos del CIFP CISLAN. Hamlet‘34 ye la so representación primera.

La música en directu ye de la Banda Gaites Xiranda, dirixida por Guillermo Pérez Iglesias y Diego C. Carmiña, y los temes qu’interpreten son composiciones propies y adaptaciones de temes tradicionales, firmaos polos directores de la banda y por Miguel A. Fernández: Marcha d’Antón, Marcha d’Antía, Ayeri vite na fonte, Fartúkate y Hamlet solu.

Fonte: Serviciu de Normalización Llingüistica del Conceyu Llangréu.
 
Díxolo Tin a les 12:45 AM | Dir a la páxina d'esta entrada | 0 Bilordios
9.2.12
Expo "100 años d'Anarcosindicalismu n'Asturies"

El Centru de Referencia de la Cultura y la Llingua Asturiana Casa de los Alberti de Ciañu acueye la esposición 100 Años d’anarcosindicalismu n’Asturies. Esta esposición, que va permanecer abierta al públicu dende’l vienres 10 de febreru al vienres 3 de marzu, organízala l’Atenéu Llibertariu de Xixón y cuenta cola collaboración de la CGT y l’Ayuntamientu de Llangréu.

La esposición fai un percorríu pela historia del anarcosindicalismu n’Asturies, dende los sos empiezos en 1910 hasta agora. Esta muestra, bien documentada, busca poner en valor la importancia d’esti movimientu, tolo que significó pa la llucha obrera y tamién la so faceta educadora. Al traviés d’una selección de prensa, llibros, cartelos y documentos d’archivu, recuerda a los sos protagonistes, evoca la obra anarcosindicalista y recupera la so memoria.


Fonte: Serviciu de Normalización Llingüistica de Llangréu.
 
Díxolo Tin a les 9:19 PM | Dir a la páxina d'esta entrada | 0 Bilordios
9.1.12
Sobre la votación meyor blogue 2011

 Igual algunu pescanció que tamos na fecha de la tradicional votación al meyor blogue n'asturianu del añu pasáu y entá nun se sabe na sobre les votaciones. Va unos díes, falamos les tres persones que más trabayaron por esti proyeutu l'añu pasáu. Los tres teníamos la mesma idea enantes de falar por diferentes razones, nun siguir esti añu cola votación al meyor blogue en llingua asturiana. Con esto nun pretendemos que muerra esti proyeutu. Si alguien tien ilusión y ganes pa siguir con ello, ponemos les cuentes de les redes sociales, llogu y tolo que faiga falta a la so disposición. Entendíamos estes votaciones como un bien común y asina tien que siguir siendo, si daquién se fai cargu d'ello.

Nun somos de los que nos presta dexar proyeutos abandonaos, pero nel tarrén personal ya nun echamos tantu tiempu como enantes a la bloguesfera, nin si quiera al nuesu blogue. Anguañu, dellos proyeutos estremaos ocupen el nuesu tiempu. Esto, xunío a la rempuesta que los propios blogueros y blogueres dieron al caberu sidra&blogues, onde se entregaron los premios de les pasaes votaciones, fai que tengamos nidio qu'esti añu nun vamos ser nós, los que tiremos d'esti carru. Tolo que se trabayó fízose de votu propiu, con ilusión y ensin esperar na a cambiu, pero agora ye'l tiempu de tar a otres coses y d'entregar el relevu.

Dende equí, milenta gracies a la xente que trabayó por que l'asturianu na rede saliera de la corripa y tuviera repercusión al traviés d'estes votaciones.
 
Díxolo Tin a les 7:42 AM | Dir a la páxina d'esta entrada | 0 Bilordios
21.12.11
Llora el Manglar

El Centru de Referencia de la Cultura y la Llingua Asturiana Casa de los Alberti acueye la proyección del documental con guión y dirección de Leandro Velasco, que va tar presente nel actu. El documental va echase mañana xueves 22 d’avientu, a les 19:00 hores. N’acabando la proyección va abrise un tiempu d’alderique y coloquiu. L’actu organízalu PROYDE Asturies y cuenta cola collaboración de Conceyu de Solidaridá y Xusticia y l’Ayuntamientu de Llangréu.

El documental narra la llucha de la comunidá d’Olmedo, un llugar de población afroecuatoriano, contra una empresa camaronera que vien causando la destrucción del ecosistema y de los medios de vida de la comunidá. Demientres sieglos, esti pueblu vivío n’armonía cola naturaleza, pero esta rellación amenázala de muerte l’apaición d’esta empresa camaronera que quebró l’apacible esistencia de la xente d’Olmedo. La empresa construyó grandes piscines pa la cría industrial del llagostín tropical, destruyendo la viesca de manglar y los medios de vida de la población local. La comunidá d’Olmedo, amenazada pola coldicia d’esta empresa, entamó una llucha intensa, llogrando establecer aliances dientro y fuera d’Ecuador. Llora el Manglar ye la historia d’esa llucha, fraguada en compromisos d'amistá y hermandá, por sacar alantre la so propuesta alternativa de desarrollu. El documental promoviéronlu les ONGD PROYDE, Azacán Serso Castiella y Lleón y Aspa.
 
Díxolo Tin a les 11:04 AM | Dir a la páxina d'esta entrada | 0 Bilordios
8.12.11
Duerna presenta "a mansalva" en La Felguera
Duerna va presentar el so segundu trabayu, "A Mansalva" nel Nuevu Teatru La Felguera’l próximu 9 d’avientu a les 20:15 hores El preciu la entrada ye 3€. 

A Mansalva ye un trabayu coproducíu por Duerna y Dani Álvarez que presenta la novedá de la incorporación de José Martínez a la voz y la guitarra y una montonera collaboraciones de gran nivel. Esti segundu trabayu musical presenta una gran variación de xéneros con temes mui baillables de producción propia y que beben de la tradición asturiana, italiana o bretona. 

Pa la presentación d’esti trabayu musical, Duerna va tar acompañáu de les bandes de gaites Conceyu Llangréu y Conceyu Siero, amás del Coru Padre Coll, Tomás Fernández (saxo), Rubén Menéndez (trompeta), Orestes Barbachán (congues y bongos), Tante Blanco (guitarra llétrica), Marisa Valle Roso (voz), l’Agrupación d’Etnografía y Folclor Reija de Llangréu y Joaquín y Cintya (tangu).

Fonte: Serviciu de Normalización Llingüistica del Conceyu Llangréu.
 
Díxolo Tin a les 8:40 AM | Dir a la páxina d'esta entrada | 0 Bilordios